Víðistaðakirkja

Víðistaðasókn var stofnuð 1. janúar 1977 þegar Hafnarfjarðarprestakalli var skipt. Fyrsta skóflustungan að kirkjunni var tekin á sumardaginn fyrsta, 23. apríl 1981, og kirkjan var vígð sunnudaginn 28. febrúar 1988.

Arkitekt kirkjunnar er Óli G. H. Þórðarson og innanhússarkitekt Lovísa Christiansen. Séð ofan frá minnir byggingin á engil með útbreidda vængi. Kirkjan og safnaðarheimilið eru hönnuð þannig að þau nýtist saman og í kirkjuskipinu eru sæti fyrir um 380 manns.

Samið var við listmálarann Baltasar Samper 20. apríl 1982 um að mála freskur í kirkjunni. Hann málaði verkið frá hausti 1986 til 9. janúar 1987. Myndefnið er sæluboðin í fjallræðunni og fyrir miðju ofan við altarið er brosandi Kristur sem talar til mannfjöldans. Freskurnar eru um 200 fermetrar og með stærstu kirkjulistaverkum á Norðurlöndum.

Altari, skírnarsár og predikunarstóll eru úr graníti en kertastjakar og kross úr smíðuðu silfri. Í kirkjunni er Bösendorfer flygill og pípuorgel og hún er leigð fyrir tónleika og upptökur.